|
|
Ве известуваме дека во организација на „Македонска реч”
и на Културниот центар „Точка”, на 29 април 2008 (вторник), со почеток
во 20 часот, во просториите на Точка ќе биде претставена поетската
книга на Ивица Челиковиќ Праг и огледало, што деновиве ја објави
„Македонска реч”. За книгата на Челиковиќ ќе зборуваат проф. д-р Ферид
Мухиќ и проф. д-р Кристина Николовска.
Пораките во песните на Ивица Челиковиќ ни ги доближуваат состојбите на
едно специфично искуство, се размножуваат во откривањето на феномените
на животот и неговата разнородност, станувајќи едновремено достапни
онолку колку што е достапен и разбирлив светот што не опкружува.
Поетот е соучесник, замешан во убавините и ужасите на светот, упорно
трагајќи по духовна слобода и светлина во просторите мегу хаосот и
воспоставената хармонија.
Стихозбирката Праг и огледало е негова петта поетска книга.
Автор е на книгите: Школки во рацете (поезија, 1990), Долги граници со
небото (поезија, 1992), Метаморфози на патот (поезија, 2002), Зад
источната линија (роман, 2004), Возови во пајакова мрежа (поезија,
2006).
Ивица Челиковиќ живее и работи во Гетеборг, Шведска. Член е на
Друштвото на писателите на Македонија од 1990 година. Од 2003 е член
на Сојузот на шедските писатели.
Добитник е на наградите Млада Струга, Златно перо и Иселеничка
грамота.
Преведува шведска и норвешка на македонски јазик. Превел десетина дела
од познати сведски писатели, мегу кои од Аугуст Стриндберг, Селма
Лагерлеф, Торгни Линдгрен, Биргита Тротциг и Катарина Фростенсон.
Составувач е на антологијата Македонска поезија што во негов превод на
шведски јазик беше објавена во 2005 година. |
